Ganito Pala ang Magmahal

Madami na akong pinaiyak na tao.
May magagawa ba ako kung sila naman mismo ang pumili sa akin?
Subalit ako mismo ay umiyak na din noong ako ay ‘nagmahal‘.
‘Nagmahal’ ako kahit hindi ko naman talaga ginusto.

Hindi lahat sila ay pinahalagahan ako.
May ibang hinahayaan lang ako sa isang tabi at nag-iisa.
Masakit pero wala akong magawa kundi ito ay tanggapin.
Tanggapin na wala siyang pakialam sa akin.

Pero may ilan namang sobrang minahal ako.
Sa isang munting bahay-kubo lang ako nakatira.
Pero binigyan niya ako ng pagkakataong makarating sa iba’t ibang lugar.
Lugar na mayayaman lamang ang nakakapunta.

Espesyal ang pagtrato niya sa akin.
Gustong gusto niya ang natural na halimuyak na aking taglay.
Naging masaya ako sa piling niya kahit alam kong madami kami sa kanyang buhay.
Buhay na nagsimula sa kanyang kusina.

May iba naman na sobrang sakim sa salapi.
Ginawa nila akong isang negosyo.
Manggagamit sila!
Sila na aking ibinoto!

Patago nila akong dinala sa isang lugar.
Nakilala ko ang ilan sa kanila – mga kilalang tao sa gobyerno.
Sa harap ng maraming tao ay nagpapanggap lang pala sila.
Sila ang mga makabagong unyango!

Isang araw ay natagpuan ko ang aking sarili sa tambakan ng basura.
Nasa isang tabi ako ng napakaruming palengke.
Halos mamatay ako sa baho ng amoy.
Amoy na hinding hindi mo gustong langhapin.

Nang biglang may isang lalaki ang umakay sa akin.
Hindi niya ako pinandirihan o hinusgahan
Wala siyang pakialam kung ang buhay ko ay isang patapon.
Patapon pero umaasa pa din.

Nakita niya ang dahilan kung bakit ako isinilang sa mundong ibabaw.
Siya lamang ang nagparamdam nito sa akin.
Kitang kita ko sa kanyang mga mata ang pagmamahal.
Pagmamahal ng isang Dakilang Lumikha.

Hindi ko namalayan na umiiyak na pala ako.
Matagal na din noong huling umiyak ako ng ganito
Hinawakan ko ang kanyang palad.
Palad na may bakas ng mga sugat ng kahapon.

Handa akong magbago.
Handa akong bigyan ang aking sarili ng isa pang pagkakataon.
Handa akong harapin ang bukas na may dalang pag-asa.
Pag-asa na siya mismo ang nagbigay.

Ako ay ‘nagmahal’ at nabigo.
Pero may isang tao pa din pala ang handang magmahal sa akin.
Alam ko na kahit ayaw ng nakararami, patuloy akong ‘magmamahal‘.
‘Magmamahal’ ako dahil ang lahat naman ay ‘magmamahal’ habang tumatagal.

Nakikilala mo na ba ako?
Siguradong nagkita na tayo.
Ang buo kong pangalan ko ay Bu Yas.
Ako nga ito.
AKO SI BU YAS.

Note: Inspired by the story of the woman caught in adultery (John 8).

---

---

ADVERTISEMENT

Nagpapasalamat si Doctor Eamer sa lahat ng kanyang mga masugid na mambabasa. Nakakataba ito ng puso niya (Sana nga tumaba na din siya). Madami siyang natatanggap na magagandang mensahe at feedbacks sa kanyang mga sinusulat kaya naman inihahandog niya ang kanyang unang libro para sa lahat ng sumusubaybay sa kanyang mga blogs.

Mangyari lamang na mag-iwan ng mensahe sa iamdoctoreamer@gmail.com kung gusto mong magpa-reserve ng kopya ng kanyang libro. First-email-first-reserve-basis po kasi dahil limitado lamang ang kopyang kanyang ipapalimbag. Pag-usapan na lang natin kung paano mo maibibigay ang bayad at paano ko maipapadala ang libro sa iyong kinaroroonan. 🙂

UPDATES (As of February 22, 2016): Available na ang 2nd printing ng aking book! Check this link for details.